CEBU, Philippines — Ang South Road Property (SRP) mao ang gihimong firecracker zone sa Dakbayan sa Sugbo diin gibuksan kini niadtong Huwebes alang sa mga manindahay ug pabuto.
Ang chairman sa committee on public order konsehal Phillip Zafra nibutyag nga gipaniguro sa city government nga luwas ang dapit batok sa posibleng disgrasya.
Ang mga manindahay og pabuto gi-required sa pagbutang og mga baril sa tubig, balas, fire extinguisher ug “no smoking” ug “no testing” diha sa maong lugar.
Nasayran nga nidoble ang preyos sa mga pabuto karon tungod sa kanihit sa supply.
Katunga sa presyo ang gimahal sama sa kwitis nga kaniadto tag P4 lang apan karon tag P8 na ang buok, Judas belt P300 ngadto sa P1,000 ang price range.
Usa sa mga vendor nagkanayon nga tungod sa kanihit sa supply posisbleng dili na maabtan sa bag-ong tuig ang ilang mga baligya. Nipahimangno si Zafra nga dili mamaligya og firecrackers sa bisan asa nga mga dapit sa siyudad gawas lang diha sa SRP.
Dugang ni Zafra nga kinahanglang ang mga barangay mobutang og mga dapit diin anha tugotang makapabuto ang mga tawo.
Sa laing bahin, subli nga gisusi sa kapolisan ug kabomberohan ang mga buhatan sa pabuto diha sa Barangay Babag, Siyudad sa Lapu-Lapu.
Matud ni Police Colonel Elmer Lim, director sa Lapu-Lapu City Police Office nga tumong sa paghimo nila sa ikaduhang higayon nga pagsusi sa mga buhatan sa pabuto pagsiguro kini nga masubay ang luwas nga pamaagi sa paggama og mga pabuto sa paglikay sa aksidente.
Gibutyag ni Lim nga dugang mga polis ang ipakatap diha sa kadalanan sa pagpatuman sa kahapsay ug kalinaw panahon sa pasko ug bag-ong tuig. (/BDB) (BANAT NEWS)