CEBU, Philippines — Isip kanhi miyembro sa Communist Party of the Philippines-New People’s Army (CPP-NPA), nipadangat si Konsehal Pastor "Jun" Alcover sa iyang pahasubo sa pamilya sa mipanaw nga founder ug chairman sa maong grupo nga si Jose Maria Sison.
Gipadayag ni Alcover ang iyang mensahe pinaagi sa iyang privilege speech atol sa session sa Konseho sa Dakbayan sa Sugbo kagahapon, Disyembre 21, 2022. Nagkanayon ang konsehal nga bisan pa man og mortal nga kaaway sa gobyerno si Sison, gikinahanglan gihapon ang paghatag og respeto sa kamatayon niini.
"It would be unchristian for us to celebrate a death of another being, even our mortal enemies, they deserve respect beyond the grave," matud pa sa konsehal. Gitataw hinuon sa konsehal nga ang armadong pakigbisug alang sa kausaban dili saktong pamaagi ug base kini sa iyang kaagi sa 10 ka tuig niya sa bukid kaniadto.
"My message to our youth and Red Activists, dili lalim ang magpabukid ug mag rebelde batok sa atong gobyerno tungod lamang sa usa ka idolohiyang sayop.
I learned the hard way. Violence will never achieve an everlasting peace and progress," dugang pa ni Alcover.
Nanghinaot si Alcover nga ang kamatayon ni Sison mao usab ang maghatag og direksyon alang sa kamatayon sa komunistang idelohiya niini.
"Daghan ang kinabuhi nga nakalas, apan walay nakab-ot nga tinuod nga kausaban pinaagi sa armadong pakigbisug. Since then, my advocacy is to be a vocal advocate of Anti-Communism," niya pa. —/MEL (BANAT NEWS)