CEBU, Philippines — Nangreklamo ang mga job orders nga kawani sa lungsod sa San Fernando tungod kay pila ka buwan na silang wala makadawat sa ilang sweldo.
Si Fermina Naneth Parba, nadestino sa buhatan ni bise mayor Ricci Reluya nisumbong sa Banat News sa ilang nasinati nga kalisdanan.
Matud pa niya nga niadto pang buwan sa Hulyo wa na gyud sila makadawat sa ilang sweldo hangtud karon nga hapit na sab ang Pasko.
Siya nagkanayon nga silang mga JO nagkadiin-diin na og pangutang aron lang makakaon uban sa pasalig sa ilang giutangan nga makabayad ra sila panahon nga sila masweldohan.
Asoy pa niya nga ang pundo sa Sangguniang Bayan (SB) nga P2.8 milyones ka pesos nga unta maoy kuhaan sa ilang sweldo gi re-align ug gihatag ngadto sa buhatan sa mayor.
Ang nakapaguol kanila kay sila lang nga mga kawani nga nisuporta sa kanhi administrasyon ang wala masweldohi.
Iyang gipasabot nga sa dihang gi re-align ang pundo wala makatambong si Reluya tungod sa iyang opisyal nga lakaw. Moabot sila ka 24 ka mga job order nga kawani, 18 ubos sa buhatan sa bise mayor ug tagtulo ka kawani sa konsehal nga nisuporta sa kanhi administrasyon.
“Ambot lang ani nila nga pirme naman lang gyud mi nila daug-daogon. Pasko na unta pero lisod among pasko ani karon,” matud pa ni Parba.
Nagtuo siya nga napagan sila sa pamolitika sa kasamtangan nga administrasyon.
Iyang gihangyo ang naa sa pangatungdanan nga unta matagad ang ilang hangyo bisan naman lang ihatag nila kini isip pinaskohan.
Hangtud ning pagsuwat sa balita, wala pay nadawat nga tubag Banat News gikan sa kadagkoan sa maong lungsod kabahin sa reklamo sa maong mga kawani. (BANATNEWS)