CEBU, Philippines — Gisugdan na og trabaho ang phase 2 sa circumferential road sa lungsod sa Pilar sa Camotes Island human sa groundbreaking sa maong proyekto.
Si Gobernador Gwendolyn Garcia uban sa mga lokal nga opisyal sa Probinsya ug sa lungsod sa Pilar nga gipangulohan ni Mayor Manual “Winkey” Santiago maoy nangulo sa maong groundbreaking niadtong Nobiyembre 25.
Ang maong proyekto gipangayo sa lungsod ngadto sa Kapitolyo alang sa pag semento sa dalan sa Ponsono island o sa lungsod sa Pilar.
Segun sa tahu sa Sugbo News, ang news arm sa Kapitolyo nga ang phase 2 gigastohan og P109.2 milyones.
Ang tibuok circumferential road gibahin kini og upat ka phase kon diin sumatotal gibanabana nga moabot kini sa sobra P50 million. Si Santiago nagpasalamat ngadto kang Garcia sa pagtubag sa hangyo sa lungsod aron ipaayo ang dalan didto sa Pilar nga usa sa problema sa mga residente. (BANATNEWS)