CEBU, Philippines — Pipila ka mga piniling opisyal ug mga residente diha sa mga bukirang barangay sa Siyudad sa Sugbo ang nipadangat og suporta sa plano ni Konsehal Pastor Alcover, Jr. alang sa pagbukas sa alternative arterial routes sa ilang dapit ingon man usab ang paghingalan sa 10 kilometros nga dalan sa Barangay Talamban ngadto sa Agsungot sa pangalan ni kanhi Presidente Ferdinand Marcos, Sr.
Nagpadayon gihapon ang consultative meetings sa nagkadaiyang barangay ug giingong kasagaran niini ang nisuporta sa maong lakang.
Base sa kopya sa manifesto ilang gipadayag ang taud-taod na nila nga gipangandoy nga makabaton og lapad nga dalan diin maghatag og kasayon alang sa ekonomikanhong kalihokan sa kabukiran.
Usa sa mahatag nga kaayohan niini mao nga mahimong tulin ang pag-transport sa mga produkto sa kabukiran.
Nahisgotan usab sa manifesto nga ang maong lakang adunay kalabotan sa farm-to- market roads sa mga bukirang barangay subay sa tinguha ni Mayor Michael Rama nga masusama sa Singapore ang Dakbayan sa Sugbo.
“We are all aware, that the late president is the source of inspiration to our beloved President, His Excellency Ferdinand “Bongbong” Marcos Jr., in the performance of his duties and responsibilities in steering this country to progress”, tipik sa manifesto.
Lakip usab sa nahisgotan sa manifesto nga gipakita sa mga Sugbuanon ang pagsuporta niini sa kasamtangang administrasyon ug haom lang nga gamiton ang pangalan sa kanhi presidente alang sa maong dalan sa kabukiran.
“Lastly, the late Marcos Sr. had contributed a lot of hard work and perseverance in making Cebu as the center of economic growth in Central Visayas and as he served the country during his term is worthy of such acknowledgment, laing tipik sa manifesto. (/BDB) (BANAT NEWS)