CEBU, Philippines — Moabot sa P1.4 bilyones pesos ang gipangayo ni mayor Gerald Anthony “Samsam” Gullas alang sa iyang budget sa tuig 2023.
Matud pa ni Gullas nga ang kantidad mas gamay og 15 porsyento sa karon nga tuig tungod kay nigamay ang National Tax Allotment (NATA).
Apan ang mayor masaligon nga dili ra maapektahan ang ilang prayoridad nga proyekto ug mga serbisyo.
Suma pa niya nga patas ang ilang pagbahin-bahin sa pundo sa matag opisina pero kadtong mga social services wa gyud nila giapil sa paglaslas og pundo aron mas daghan ang matabangan.
“I don’t think naay one program nga ni excel but divided ni siya equally. Rest assured, we give the same brand of service,” nagkanayon si Gullas.
Gihimug-atan sab niya nga nigahin sila og P10 milyones pesos alang sa TESDA nga programa tungod kay gusto siya mas daghan nga Talisaynon ang makat-on sa mga skilled programs nga maoy dali nga makakita og trabaho.
Nagmalaumon sab siya nga ang iyang gipangayo nga pundo mahatagan og suporta sa konseho sa Talisay nga maoy mo review sa iyang proposed budget alang sa tuig 2023.— MEL (BANATNEWS)