CEBU, Philippines — Nagplano karon ang garbage czar sa Dakbayan sa Sugbo Grace Luardo nga moduso og proposal nga padugangan ang gidaghanon sa Barangay Environmental Officers (BEOs) isip kabahin sa puwersa alang sa kampaniya sa Gubat sa Basura.
Matud ni Luardo nga ang siyudad adunay 80 ka barangay ug aduna lang kini kapin sa 200 ka BEO ug kulang kaayo ang maong gidaghanon.
Ang ubang barangay kay duna ra’y tulo ka BEO ug adunay mga barangay nga walay BEO.
Nagkanayon si Luardo kinsa mao usab ang hepe sa City Environment and Sanitation Enhancement Team (CESET) nga mohimo na siya karon og lapad nga koordinasyon ngadto sa ka baranggayan alang sa pag-umol og alternatibong solusyon samtang anaa pa sa proseso ang tinguha nga madugangan ang mga BEO.
Usa sa nakita niya mao ang pag-deputize sa ubang barangay workers sama sa mga barangay tanod nga mo-roving diha sa mga sitio.
Gawas sa pagsita sa mga badlongon, ang BEO usab ang mopahinumdum sa mga tawo alang sa schedule sa paglabay sa basura sa ilang dapit.
Isyohan usab a BEO og citation tickets ang magpataka lang og labay og basura, magpataka og luwa, pangihi ug pagpanigarilyo diha sa pampublikong lugar.
Hangtod karon, nagpadayon ang programa sa siyudad nga Basura Storm Clean-Up diin nagtinabangay ang mga empleyado sa city hall sa paglimpiyo sa kadalanan uban usab sa kooperasyon sa nagkadaiyang ahensiya sa gobiyerno, barangay workers ug mga organisasyon. — (/BDB) (BANAT NEWS)