CEBU, Philippines — Aduna nay lead ang kapulisan sa Dakbayan sa Sugbo bahin sa pagpusil patay sa usa ka babayeng bag-ohay lang gibuhian gikan sa detention cell sa Mambaling Police Station sa miaging semana.
Ang 19-anyos nga si Riza Barbosa, gipusil sa wala mailhing lalaki samtang kini naglakaw diha sa Spoliarium Street, Sitio Panaghiusa, Barangay Duljo Fatima ning Dakbayan sa Sugbo niadtong Sabado sa hapon.
Gitug-an ni Police Lt. Col Wilbert Parilla, Deputy City Director for Administration sa Cebu City Police Office sa mga tigbalita ilang gidudahan nga may kalambigitan sa ilegal nga drugas ang pagpatay sa maong babaye.
Si Barbosa taga Sitio Naba, Alaska Barangay Mambaling ning Dakbayan sa Sugbo gidakop ug gi-detain sa kapolisan sa Mambaling Police Station human nadakpan nga nagsugal og hantak.
Apan human siya gibuhian ug naglakaw sa maong dapit kalit nga dunay lalaking miduol ug mipusil sa biktima.
Sa sayo pa human sa hitabo, dunay nakaylap nga impormasyon ang kapolisan nga giingong surambawon sa biktima ang shabu nga gipapalit kaniya pinaagi sa pagilis niini og asin.
Ang kapulisan padayon pa sa ilang gihimo nga imbestigasyon bahin sa maong krimen. —IBM (BANATNEWS)