CEBU, Philippines — Usa ka retirado nga polis nga giingong wanted sa kasong frustrated murder ang nasikop sa Sitio Soton, Barangay Pangdan, Naga City, Huwebes sa hapon.
Ang 58-anyos nga kanhi polis mao si Leoncio Salubre Jr., gisikop diha sa iyang balay sa Dakbayan sa Naga.
Matud pa ni PRO7 Director Police Brigadier General Roque Eduardo DP Vega, ang maong kanhi polis nasigpatan sa mga operatiba sa 1st PMFC, CPPO, CMFC, CCPO, ug CIDG Cebu City Field Unit diha sa maong dapit.
Gikatahong dugay na kining gipangita ug gikonsiderar nga No. 1 Most wanted person provincial level sa maong dakbayan. Aduna kini standing warrant nga frustrated murder.
Walay girekomendar nga piyansa si Presiding Judge Soliver Peras , Regional Trial Court Branch 10 niadtong April 22, 2022 nga maoy nagisyu sa maong warrant of arrest. Sumala pa ni Vega ilaha gayud ipatuman ang balaod nga walay kahadlok ug pabor-pabor. —/IBM (BANAT NEWS)