CEBU, Philippines — Suportado ni Talisay City Mayor Gerald Anthony “Samsam” Gullas Jr. ang face to face classes sa mga tinun-an sa siyudad. Matud ni Gullas nga duna siya’y meeting tali sa school’s division superintendent tungod kay ang gipasar sa siyudad nga Special Education Fund (SEF) kadto pa kini sa wala pa nahitabo ang bagyong Odette.
Ang Department of Education (DepEd) Talisay City Division dunay priority projects sa wala pa ang Odette apan matud ni Gullas nga kinahanglang i-amendar sa Local School Board ang SEF budget aron mohaom sa rehabilitasyon nga pagahimuon human niigo ang bagyong Odette. Nanghinaot si Gullas nga magkatagbo sila sa Local School Board sa unang semana sa buwan sa Hulyo. Pipila sa mga nakompleto na og repair sa engineering department sa siyudad mao ang roofing sa Lawaan 1 Elementary School ingon man ang roofing ug installation sa canopy sa Lawaan 3 National High School.
Samtang si Police Lieutenant Colonel Randy Caballes hepe sa kapolisan sa siyudad nagkanayon nga aduna na sila’y close coordination sa school heads ug ang iyang mga personnel nihimo na usab og inspection sa mga tunghaan. Dugang ni Caballes nga ang ilang focus mao ang siguridad sa mga estudyante inig pahigayon sa face to face classes. (BANAT NEWS)