CEBU, Philippines — Gibutyag ni Dr. Lino Alanzado, city health officer sa Dakbayan sa Talisay nga kada adlaw nagpahigayon sila og misting ug uban pang lakang aron batokan ang sakit nga dengue.
Matud ni Alanzado nga niining buwana adunay 20 ka kaso sa dengue ang ilahang natala lakip niini ang 7-anyos nga bata nga namatay.
Ang maong bata na-admit kini diha sa Talisay District Hospital niadtong Hunyo 8, 2022 gumikan sa dengue ug nakabsan kini sa iyahang kinabuhi niadtong Hunyo 16, 2022.
Sukad niadtong buwan sa Enero niining tuiga mao kini ang ikaduhang natala nga namatay tungod sa dengue diin una nahitabo niadtong buwan sa Abril.
Si Alanzado nihangyo sa katawhan sa siyudad nga motabang sa pagpanglimpiyo tungod kay gikinahanglan nila kini bisan og ang siyudad nihimo na og mga lakang paglikay sa dengue.
Samtang si Talisay City Mayor Gerald Anthony “Samsam” Gullas Jr. nagkanayon nga ang vaccination centers sa dakbayan katunga sa ilahang mga tawo gikuha aron makatabang sa pagpahigayon og misting ug pagtubag sa problema sa dengue sa siyudad.