CEBU, Philippines — Nabuhiag paglaum si Talisay City Mayor Gerard Anthony ‘Samsam’ Gullas human nasayran nga dunay mga produkto sa Talisay City College ang nakapasar sa bag-ohay lang natapos nga LET Examinations niadtong Marso 27,2022.
Nasayran nga sa 10,039 elementary teacher passers, ang usa pa gyud sa ilang produkto nga si Lucille Dejos nabutang sa top 3 pinaagi sa iyang 91.40% rating.
“Amidst all the political criticisms that the Talisay City College is supposedly underperforming and supposedly not doing well, here comes news that we have a LET topnotcher from the Talisay City College,” ni Gullas pa.
Gi-congratulate ni Gullas Dejos tungod sa nadawat nga dakong dungog sa siyudad ug sa TCC pinaagi kaniya.
Lakip sa giila ni Gullas si Marisse Lahaylahay Sabanal, usa sa mga staff sa Emergency Operations Center (EOC) sa siyudad nga produkto sab sa TCC nga nakapasar sab sa LET bisan pa man sa kadaghan sa trabaho tungod sa pandemiya sa Covid-19.
Ang TCC dunay napulo sa 11 ka first-timers ug 19 sa 24 ka repeaters nga nikuha sa teacher’s board exams ang nakapasar.
Sa kinatibuk-an, ang TCC duna karoy 82.86% passing rate pinaagi sa ilang 29 ka passers ug unom lang ang nahagbong.
Gipasalamatan ni Gullas si TCC president Richel Bacaltos ug tanang mga kawani sa TCC sa maong kalamposan.
“You cannot put a good school down. Garbo sa Talisay and garbo sa Talisay City College,” matud pa sa mayor.— The Freeman/IBM