CEBU, Philippines — Gihangyo karon sa Kagamhanan sa Siyudad sa Sugbo ang street vendors nga motuman lang gyud kanunay sa mga lagda sa ilang pagpamaligya aron mamintinar ang kahapsay sa kadalanan.
Suma pa sa pangu sa Market Operations Division nga si Raquel Arce nga nasayod na daan niini ang regulated vendors.
Matud pa niya nga ang pagtinabangay sa duha ka habig tali sa gobyerno ug manindahay maoy yawe alang sa hapsay nga pagpamaligya sa ilang mga produkto sa kadalanan.
Una na nga nabalita sa miaging adlaw nga dili na mga baligya kundi ang ID nalang maoy kumpiskahon alang sa vendors nga makalapas sa lagda.
Sa higayon nga makumpiskar ang ilang ID, hatagan sila og higayon nga motambong og seminar sulod sa usa ka semana aron ilaha kini nga mabawi.
Gitambagan ni Arce ang mga manindahay nga mosunod sa mga lagda sama sa pagtuman sa mga area kun diin gitugotan sila nga makapamaligya.
“Sauna, ang mga baligya man ang atong-iconfiscate. Sa karon,kay ang ID nalang gyud. Kinahanglan nga duna gud tay disiplina, kay alang raman sad na sa kahapsay sa kadalanan “ matud pa ni Arce.
Sa inisyal nila nga datos, adunay kapin sa singko mil ka ambulant vendors ang siyudad sa Sugbo ug gi regulate gyud kini aron dili makabalda sa kadalanan.
Gitataw hinoon ni Arce nga duna sila’y nakalinya nga mga panagtigom sa vendors aron mapahimangnoan kini sa ilang mga responsibilidad. MEL (BANATNEWS)