CEBU, Philippines — Sa labing ulahi nga update, ang Visayan Electric naka-energize na og 460,381 sa 474,182 ka mga apektado nila nga mga kustomer sa ilang franchise area nga naglangkob sa Cebu City, Mandaue City, Talisay City, Naga City, San Fernando, Minglanilla, Consolacion ug Liloan.
Padayon ang lapad nga restorasyon sa mga linemen sa maong kompanya ug sa ilang mga partner ngadto sa mga linya sa kuryente nga naapektohan og maayo human gilampornas ang Sugbo sa bagyong Odette niadtong Disyembre sa miaging tuig.
Sa nangaging statement sa Visayan Electric, dunay mga lugar nga nikaon og oras sa restorasyon sa kuryente tungod sa "magnitude" sa kadaut niini sa linya, poste ug transformer.
Lakip sa nahisgotan niini kaniadto mao ang dakong damage sa bagyo ngadto sa pipila sa ilang mga Elevated Meter Clusters (EMCs).
Gipaneguro usab sa maong kompanya ang kaluwasan sa katawhan samtang nagpadayon ang pag-ayo sa mga linya sa kuryente. —MEL (BANATNEWS)