CEBU, Philippines — Giklaro sa pangulo sa Kugi Uswag Sugbo Konsehal Raymond Garcia nga mohimo pa siya og konsultasyon sa board of directors sa iyang partido kalabot sa i-endorsar nila nga pagka-presidente.
Mao kini ang pagtin-aw ni Garcia human ang Partido BARUG-PDP Laban ni Mayor Michael Rama pormal na nga ni-endorsar kang kanhi Senador Bongbong Marcos pagka-presidente sa nasud.
Si Garcia maoy running mate ni Rama sa umaabot nga piniliay sanglit nalakip ang KUSUG sa coalition sa BARUG.
Matud ni Garcia nga adunay personal nga choices ang miyembro sa iyang partido ug iyaha kining girespeto hinuon aduna silay panagtigom nga pagahimuon sa sunod adlaw.
Usa usab sa nalakip sa coalition sa BARUG mao ang Partido Panaghiusa nga gidumala ni Atty. Joey Daluz kinsa nitataw nga dili siya maka-endosar kang Marcos .
Ang iyang inahan nga si kanhi Nenita Cortes-Daluz kay usa sa mga nakigbatok sa Martial Law niadtong 1980s.
Natukod ang Partido Panaghiusa sa pakigbatok sa diktador hinungdan nga gitataw ni Daluz nga dili gyud niya ma-endosar si Marcos.
Determinado siya nga ipabilin ang direksiyon sa karaang Partido nga iyang gibanhaw.
Samtang ang laing sakop sa BARUG -PDP Laban Konsehal James Cuenco nipadayag usab nga dili siya makakampaniya kang BBM isip respeto sa iyang amahan nga si kanhi kongresista Antonio Cuenco kinsa nailhan usab kaniadto nga nakigbatok sa Martial Law.
Bisan pa man nga dili si Marcos ang ilang presidente ilaha gihapon nga suportahan ang running mate niini nga si Davao City Mayor Sara Duterte.
Giklaro nila ni Daluz , Garcia ug Cuenco nga bisan pa man nga lahi ang ilang baroganan sa national level magpabilin ang lig-on nila nga alyansa ngadto kang Rama nga maoy pambato nila pagka-mayor. —BDB (BANATNEWS)