CEBU, Philippines — Gipahibalo nilang Cebu Fifth District Representative Vincent Franco “Duke” Frasco ug kapikas nga si Liloan Mayor Christina Garcia Frasco magpadayon sa ilang pagsuporta sa Uniteam nilang kanhi senador Ferdinand “Bongbong” Marcos Jr. ug Davao City Mayor Inday Sara Duterte sa umaabot nga piniliay.
Ang magtiayon una nang nakahimamat ang duha didto sa Davao City niadtong Disyembre 7, 2021.
Kahinumdoman nga si Gobernador Gwendolyn Garcia ang pangulo sa One Cebu Party nipahibalo ng daan nga ang ilang partido wala pay giendorsar nga kandidato sa pagka presidente.
Gihatagan hinuon niya og kagawasan ang iyang pamilya kun kinsa ilang paluyohan.
Apan ang igsuon sa gobernador nga si Congressman PJ Garcia sa 3rd district nipadayag ng daan nga kang Isko Moreno kini mosuporta. Ang gobernador wala pa sab modeklarar nga si Moreno maoy pilion niini.
Kahinumdoman nga human sa filing of the certificates of candidacy gitudlo dayon ni Duterte si Mayor Frasco isip tigpamaba niini.
Nanumpa sab si Frasco sa Lakas Christian-Muslim Democrats (Lakas-CMD) nga gipangulohan karon ni Duterte. Silang Marcos ug Duterte maoy dinapit sa gihimong LMP Central Visayas regional planning conference niadtong bulan sa Nobiyembre.—IBM (BANATNEWS)