CEBU, Philippines — Mitaliwan kagahapon sa kaadlawon sa edad nga 70 si Cebu City Mayor Edgardo Labella gumikan sa “septic shock secondary to pneumonia” nga resulta sa iyang gihambing sakit.
Sumala pa sa iyang anak nga si Jaypee Labella nga 23 ka adlaw sa pribadong tambalanan ang amahan hangtud nga kini nabugtoan sa iyang kinabuhi.
“We mourn the loss of the Mayor who, throughout his years in government service, kept close to his heart the people he served,” suma pa ni Jaypee.
Nagsulod gawas na sa tambalanan ang mayor tungod sa sakit nga pneumonia. Sa miaging buwan nipaubos kini og indefinite leave tungod sa iyang sakit.
Unang termino pa kini ni Labella pagka-mayor human siya nakadaog sa piniliay niadtong 2019 batok sa kanhi mayor nga si Tomas Osmeña.
Nagbaha usab sa social media ang mga pahasubo nga mensahe alang sa pamilya sa mayor gikan sa mga yanong Sugbuanon ngadto na sa mga opisyales sa gobiyerno.
Gibutang sab sa half-mast ang Cebu City Hall agi og pagtahod ug pagrespetar sa nitaliwang amahan sa siyudad.
Tungod sa nahitabo, giputol og sayo ni Cebu City acting Mayor Michael Rama ang iyang bakasyong 15 ka adlaw. Iyang gihulagway si Labella nga usa ka maayong partner sa panerbisyo sa publiko.
Nagkasuod ang duha niadtong 2012 sa dihang silang duha nag-tandem, si Labella ang bise mayor samtang siya maoy mayor sa dakbayan. Matud ni Rama giisip niya nga parte sa iyang pamilya si Labella.
Wala kalimti ni Rama ang pag-unong kaniya ni Labella sa panahon nga nakasinati siya og kalisdanan sa kinabuhi ug gani gidepensahan pa siya.
“He lead us during a most challenging time. Today, I have lost a good friend and partner, and the City of Cebu has lost a great public servant. On behalf of the Cebu City Government and the Rama family, we offer our deepest sympathies and condolences to Joy Labella and the whole Colina - Labella family”, tipik sa post ni Acting Mayor Michael Rama.
Ang mga konsehal sab sa siyudad sama nila ni Konsehal Dave Tumulak, Eduardo Rama Jr. Jerry Guardo, James Anthony Cuenco ug uban pa mipadayag nga usa ka dakong garbo alang nila nga makatrabaho si Labella ilabi na sa batakang serbisyo para sa katawhan sa Cebu City.
Si Konsehal Alvin Dizon sa Bando Osmeña Pundok Kauswagan(BOPK) miasoy nga bisan og managlahi ang ilahang grupo dako og pagtahod sa mayor.
Gani daghan mang ordinansa karon sa siyudad nga silang duha maoy nangamahan.
Nipadangat usab sa iyang pahasubo si Mandaue City Mayor Jonas Cortes.
“Salamat sa imong serbisyo sa katawhan ilabi na sa dakbayan sa Sugbo. Your death is a great loss to the city but we know that your legacy will live on,” matud pa ni Cortes.
Samtang si Lapu-Lapu City Mayor Junard “Ahong” Chan ni-post pud og mensahe sa iyang social media account nga nagkanayon .“Siguro ako nga nagbangutan ang mga Sugboanon karon lakip na ang iyang mga pamilya ug kahigalaan pero siguro ako nga nagmalipayon sa siya karon sa kiliran sa atong Labawng Makagagahom.”
Gi-highlight usab ni Talisay City Mayor Samsam Gullas ang dedikasyon sa trabaho ni Labella sa dihang nihugpa ang pandemya sa Covid-19.
“The Covid-19 pandemic truly tested his mettle, to the point that his own health was tested as well. But even with his death, I take solace on that fact that you are with our Creator now and that you have finally earned your well-deserved rest,” matud pa ni Gullas .
Ang tiunay nga dedikasyon sa panerbisyo maoy nakita ni Gobernadora Gwendolyn Garcia ngadto kang Labella.
“I will always remember Mayor Edgardo C. Labella for his fiery will to serve and selfless dedication to public service – as Cebu City Councilor, Vice-Mayor, and, finally, as Cebu City Mayor – despite health challenges. In behalf of the Cebu Provincial Government, I extend my deepest condolences and offer my prayers for the bereaved family of Mayor Edgar Labella. Your grief is shared by the thousands whose lives he touched,” suma pa ni Garcia.
Sa wala pa nahimong mayor si Labella, nagsilbi na siya kaniadto isip konsehal sa Cebu City North District niadtong 1998 ngadto sa 2021, ug dugang termino gikan sa 2004 hangtud sa 2013.
Nagsilbi usab siya nga bise mayor gikan sa 2013 hangtod sa 2019.— Decemay Padilla, Gabriel Bonjoc (BANAT NEWS)