Cebu, Philippines — Usa ka call center agent nga nag-sideline sa pagpamaligya og drugas ang nadakpan sa gihimong buy bust operation sa kapulisan sa Dakbayan sa Talisay kagahapon sa kadlawon didto sa sitio Kimba, Barangay Cansojong.
Ang dinakpan nailhan nga si Phil Jun Paires, 42 anyos, minyo nagpuyo sa sitio Atesan, Barangay Cansojong sa nahisgutang Syudad.
Si Police Lt. Col. Gerard Ace Pelare, pangu sa Talisay City Police Station nibutyag nga magsige na og lutaw ang pangalan ni Paires sa pipila ka mga tawo nga una nilang nadakpan.
Gani naila na kini nila nga usa ka High Value Individual (HVI) sa negosyo sa illegal nga drugas.
Nasakmit gikan sa dinakpan ang gituhuang shabu nga adunay timbang nga 52 gramos nga gibana-bana nga mobalor og P353, 600.
Si Paires ang gidala sa buhatan sa kapulisan og dayon gibalhug sa bilangguan ug gikatakda siyang pasakaan og kaso sa sunod semana. (BANAT NEWS)