CEBU, Philippines — Malinawon ang pagsaulog sa tinuig nga pangilin sa Lungsod sa Compostela nunot usab sa higpit nga pagbantay sa kapolisan diin gidili ang pagpamista sa mga dili sakop sa pamilya.
Ang pagdili base kini sa giluwatan nga Executive Order No. 10-2021 ni Mayor Froillan Quiño.
Ubos sa maong EO gidili sa panagtapok sa laing mga tawo gawas lang sa mga sakop sa pamilya.
Wala usab itugot ang pagpasiugda og kalihokan nga naglakip sa sports activities gumikan sa nagpadayong hulga sa pandemic samtang gipatuman usab ang curfew sugod sa alas 8:00 sa gabii hangtud sa alas 5:00 sa buntag.
Hinuon ang maong EO molungtad lang kini hangtud karong adlawa.
Base sa nahisgutang EO gipasabot ni Quiño nga mahinungdanon kaayo ang maong pamaagi aron magpugngan ang pagtakod sa virus sa mga molupyo ilabi na nga nisaka na usab sa gidaghanon sa bag-ong infection. BDB (BANATNEWS)