CEBU, Philippines — Ang mga unit sa Traditional Public Utility Jeep (TPUJ) nga walay “Balik Pasada” program permit mamahimong ipa-impound.
Kini ang gibutyag sa chairman sa Cebu City Jeepney Task Force Konsehal James Cuenco kinsa chairman usab sa committee on transportation sa konseho sa Siyudad sa Sugbo. Gipahibalo ni Cuenco ang tanang TPUJ operators o mga aplikante sa Balik Pasada program nga mokuha gyud og special permit sa Land Transportation and Franchising Regulatory Board (LTFRB) diin mao kini magsilbing “final step” sa aplikasyon.
Matud ni Cuenco nga pinasubay kini sa mga lagda nga nalatid sa EO 102 -Balik Pasada program sa dakbayan. “Gidili ang pag-short cut sa maong proseso ug kon mobiyahe nga walay Balik Pasada permit adunay dako nga kalapasan ug mamahimong ipa-impound ang TPUJ”, matud ni Cuenco. Subling gipahinumduman usab ang katawhan nga motuman gyud sa health protocols aron dili kini madakpan. (Sanden J. Anadia/BDB)
CCTO: Kalma lang kanunay diha sa kadalanan
Gipahinumduman sa Cebu City Transportation Office (CCTO) ang mga motorista nga “chill” lang o kanunay nga kalmado diha sa kadalanan aron malikayan ang kagubot.
Ang maong pahimangno gi-post kini diha sa facebook page sa CCTO aron dili na mausab ang nag-viral nga video sa niaging semana diin nagsukmagay ang traffic marshal sa usa ka pribadong kompaniya ug motorcyle rider diha sa Salinas Drive, Barangay Lahug, Dakbayan sa Sugbo.
Sa pakisusi sa CCTO nasuta nga naglalis ang duha human giingong nakahimo og kalapasan ang motorcycle rider nga niresulta sa sinukmagay.
Nanawagan ang maong traffic agency nga respetohon ang trabaho sa enforcers.
“Kung kita madakpan, dili nato i-personal kay trabaho ra kini sa enforcer. Respeto lang sa lagda sa trapiko ug sa atong traffic enforcer aron dili madakpan”, tipik sa pamahayag sa CCTO. BDB (BANATNEWS)