CEBU, Philippines — Ang Market Operation Division (MOD) mopahigayon og kanunay nga operasyon ug inspeksyon diha sa Pasil Fish Market ug Bagsakan Fish Market nga nahimutang diha sa South Road Property (SRP) aron masiguro nga presko ang gipamaligya nga mga isda sa maong mga merkado.
Nangunay sa pag-inspeksiyon sa mga merkado si Irvin Cabales, hepe sa MOD. Gawas sa produkto, ilaha usab nga gi-monitor ang pagpatuman sa health protocols.
Sa laing bahin, tumong sa kagamhanan sa Siyudad sa Sigbo nga mag-establisar og centralized barangay-based “Bayanihan Markets” aron makapamaligya ang mga mag-uuma ug mangingisda sa mga kaugalingon nila nga produkto.
Tumong usab niini ang pagmentinar sa kalamboan sa industriya sa agrikultura. Nasayran nga tipik lang kini sa unod sa ordinansa nga gipasar sa konseho sa siyudad niining ulahi lang sa pag-promote og sustainable food production program.
Si Konsehal Phillip Zafra maoy nangamahan sa maong ordinansa nga adunay ulohan nga “Cebu City Food Security Ordinance.” “A sustainable local food supply, production and security — an essential key to the Cebu City’s survival — is necessary for proactive and holistic approach to confront this pandemic head on in all fronts”, tipik sa maong ordinansa. BDB (BANATNEWS)