CEBU, Philippines — Giawhag karon sa Cebu City Transportation Office ang mga drayber sa mga pasaheroang traysikol nga ipa-rehistro gyud ang ilang mga unit.
Tipik kini sa mensahe sa CCTO nga gi-post sa ilang Facebook Page kagahapon diin gipahibalo nila nga nakadawat sila og daghang report nga dunay mga traysikol nga nagdagan nga walay mga rehistro. Gawas nga walay rehistro ang unit, duna puy uban nga walay lisensya ang drayber.
Suma pa sa maong ahensya nga kinahanglan gyud nga mokuha sa tukmang rekisitos ang matag drayber. “Risgo ang pagbiyahe niini labi na simbako og adunay disgrasya mahitabo tungod kay dili jud kini mabayran sa insurance labi na og maka bangga og lain nga sakyanan, matabla pud. Unfair pud sa uban nga nag tinarong og nituman sa proseso sa pagkuha og prangkisa,” tipik sa statement sa CCTO.
Ang CCTO aktibo karon sa nagkadaiyang operasyon alang sa kahapsay sa kadalanan.
Samtang mokabat sa 77 ka mga sakyanan ang gi-clamp atol sa tulo ka adlaw nga operasyon sa Cebu City Transportation Office may kalabutan sa Night Illegal Parking.
Kini nonot sa daghan gihapong reklamo nga nadawat sa CCTO diha sa ilang buhatan.
Ang mga lugar nga gipahigayonan ug operations naglangkob sa Mabolo, Lahug, Banawa, Kasambagan, Kamputhaw, Kalunasan, C. Padilla, Sto. Nino, Basak San Nicolas, Tejero, San Antonio ug Ramos. Padayong nagpahimangno ang CCTO ngadto sa mga nanag-iya og sakyanan nga dili magpataka og parking daplin sa karsada tungod kay makabalda kini panahon sa emerhensya. —Rowena D. Capistrano/MEL (BANATNEWS)