CEBU, Philippines — Ang mga unit sa Traditional Public Utility Jeep nangadugta na ug gipamaligya na lang kini apan wala pa gihapon ang resulta sa ilang hangyo nga buksan ang tanang rota sa Cebu City.
Matud ni Kapitan Clifford Niñal sa Barangay San Nicolas ug board member Cebu Integrated Transport Service Multi-purpose Cooperative (CITRASCO) nga grabe kaayo kadugay ang pagtuon ug luoy na kaayo ang kadaghanan sa drayber diin usa ka tuig na kini nga walay panginabuhian.
Nasayran nga niduso og follow-up letter si Konsehal James Cuenco ngadto kang Mayor Edgardo Labella kalabot sa rekomendasyon sa Jeepney Task Force sa pagbukas sa tanang Cebu City TPUJ routes.
Ug si Labella nipadayag nga gitun-an pa niya ang maong rekomendasyon.
Nagkanayon si Niñal nga pwerteng dugaya sa resulta sa maong rekomendasyon ug nanguli nalang sa tagsa-tagsa nila ka sa probinsiya ang ubang mga drayber.
“Ang mga unit nangalata na. Kun ang sakyanan dili gamiton sulod sa taas nga panahon, mangaguba o mangalata man gud na”, matud ni Niñal.
Sa laing bahin, si Cuenco nagkanayon nakita niya nga kinahanglan na gyud nga buksan ang tanang rota apan magpaabot siya sa approval sa mayor.
“I humbly and sincerely ask the Mayor, to please open all Cebu City TPUJ routes to ease the burden of our labor force”, dugang ni Cuenco. BDB (BANATNEWS)