CEBU, Philippines — Nipahimangno ang Cebu City Health Department (CHD) sa publiko nga magbinantayon ug dili magpalabi og pabuwad sa init.
Nabatyagan nga nagkagrabe ang init karong panahona hinungdan nga ang CHD niawhag sa katawhan nga hatagan og hustong pahuway ang lawas.
Kasagarang motumaw nga sakit panahon sa ting-init mao ang ubo, sip-on ug hilanat.
Nagkanayon ang hepe sa CHD Dr. Jeffrey Ibones nga dili angayang balewalaon ang init ug kanunay nga magdala og pandong sa higayon nga molakaw.
“Kinahanglan gyud ta moinom permi og tubig, adunay saktong tulog ug ampingan nato permi ang atong kaugalingon”, tambag ni Ibones.
Matud niya nga panahon sa ting-init motumaw usab ang skin rashes hinungdan nga kinahanglang maligo matag adlaw.
Sa laing bahin, sa pag-obserbar sa Semana Santa dili kalikayan nga magkatapok ang pamilya tungod kay bakasyon, walay trabaho ug manguli sa mga probinsiyan ang mga trabahante nga naa sa Cebu City.
Si Ibones nihangyo sa katawhan nga likayan gihapon ang panagtapok ug ipadayon ang pagpatuman sa basic health protocols sama sa pagsul-ob og mask, manghunaw ug magdala og alcohol aron malikay sa COVID)-19.
Matud usab ni Ibones nga kon dili kalikayan adunay mobisita sa pamilya unya mangaon kon mahimo dili magsige og estorya.
Giawhag usab ni Ibones ang katawhan nga sayo mamalit og sagol sa mga lutoon sa Semana Santa sama sa mga sagol sa benignit. —Decemay P. Padilla/BDB (BANATNEWS)