CEBU, Philippines — Ipahigayon na karong adlawa ang pagbakuna sa mga Barangay Health Workers (BHW) ug mga medical frontliners sa private clinics sa Cebu City matud pa ni Cebu City Councilor Dave Tumulak.
Dunay 1,600 doses sa AstraZeneca vaccines nga miabot sa Cebu City Health Department niadtong miaging adlaw’ng Domingo nga gitagana alang kanila.
Si Tumulak usa sa gitahasan ni Mayor Edgardo Labella sa pagpangita og vaccination sites alang sa rollout sa Corona Virus Disease (COVID)-2019 vaccines sa siyudad.
Niadtong adlaw’ng Lunes unta sugdan ang pagpamakuna apan ang Vaccine Board pinangulohan ni Vice Mayor Michael Rama wala makauyon nga sa Lourdes Parish-Don Bosco Youth Center sa Barangay Punta Princesa kini himuon tungod kay wala’y klarong ventilation, comfort rooms ug uban pa.
Kinahanglang mahatag kini sud sa unom ka adlaw. Kagahapon sa buntag si Rama miadto sa Robinson’s Galleria ug nakauyon siya sa lugar.
Gipahibalo sab ni Tumulak nga si Atty. Agusto Go, tagiya sa University of Cebu mitanyag sa UC-Banilad Campus aron gamitong vaccination site karong adlawa ang ilang tunghaan.
Magsugod sa alas- 8 sa buntag ang pagpamakuna sa BHWs ug medical frontliners sa mga private clinics. Susamang kalihokan sab ang gihimo na sa Lapu-Lapu City, Mandaue City ug ubang LGUs nga nakadawat na og mga doses sa bakunang AstraZeneca ug Sinovac.
Sa pikas bahin, ang Cebu City nitala og 53 ka dugang bag-ong kaso sa coronavirus disease(COVID)-2019 base sa bulletin nga gipagawas sa Department of Health Central Visayas niadtong adlaw'ng Lunes, Marso 22, 2021.
Ang Cebu City dunay 20,722 total cases sa Covid-19 diin naa sa 2,467 ang active cases. Niabot na sab sa 17,476 ang recoveries sa siyudad human napuno ang 94 samtang dugang usa ang nakalas maong nahimo na kini karong 779.
Samtang ang Mandaue City adunay 1,093 active cases karon gikan sa kinatibuk-ang 5,334 total cases sa siyudad tungod sa bag-ong 26 ka bag-ong kaso.
Ang recoveries sa Mandaue City anaa sa 4,044 human napun-an og 47 ug 197 ang deaths.
Ang Lapu-Lapu City sab dunay 1,056 ka active cases sa 5,288 nga kinatibuk-ang kaso niini tungod sa 20 ka bag-ong nadugang. Miabot na sab og 4,101 ang recoveries sa dakbayan tungod sa nadugang nga 25 apan dunay usa nga napuno sa mga namatay maong 131 na kini karon.
Sa datos sa DOH-7 ang Central Visayas dunay 47,089 total cases; 6,556 ang aktibong kaso; 38,827 ang naayo naug 1,706 ang deaths.— IBM (BANATNEWS)