CEBU, Philippines — Gisugdan na sa pagpamakuna ang mga medical frontliner sa Mendero Hospital, Lungsod sa Consolacion kagahapon.
Unang nagpabakuna ang CEO sa maong tambalanan nga si si Dr. Samuel Mendero III kinsa si Mayor Joannes “Joyjoy” Alegado ang nisaksi sa kalihokan.
Nasayran nga CoronaVac sa Sinovac ang gibakuna kang Mendero lakip sa 145 ka hospital staff maong tambalanan.
Sa laing bahin, si Archbishop Jose Palma nibutyag nga ang Archdiocese of Cebu nag-order na og bakuna alang sa mga kaparian.
Matud ni Palma nga nakig-alayon na sila sa Office of the Presidential Assistant for the Visayas alang sa maong mga bakuna.
Si Palma nagkanayon nga bisan unsa nga bakuna ang moabot ug aprobado sa gobiyerno andam sila sa pagpabakuna niini.
Gibutyag ni Palma nga aduna sila’y giandam nga budget alang sa maong mga bakuna apan kong ihatag kini nga libre mapasalamaton usab sila niini. Samtang sa Dakbayan sa Talisay si Mayor Gerald Anthony “Samsa” Gullas Jr. ug city health officer Dr. Lino Alanzado ang makigtagbo kang retired general Mel Feliciano, chief implementer sa inter-agency task force kalabot sa estado sa bakuna karong semanaha.
Ang Siyudad sa Talisay wala pa makadawat sa bakuna batok sa COVID-19.
Ang City Health Office (CHO) sa siyudad han-ay na kini alang sa schedule sa pagpamakuna.
Si Alanzado nagkanayon nga mag-una sila sa Rural Health Unit (RHU)-1 diha sa gym sa Barangay San Roque ug San Isidro.
Mosunod dayon ang RHU-2 diha sa gym sa Barangay Tabunok ug Jaclupan, hangtud sa RHU-3 sa Barangay Lawaan 1 ug Mohon gym.
Matud ni Alanzado nga limitahan lang nila sa 150 ngadto sa 200 ka tawo kada adlaw ang bakunahan. — Rowena D. Capistrano, Gabriel C. Bonjo/BDB (BANATNEWS)