CEBU, Philippines — Andam na nga modawat og pasyente ang bag-ong Hemodialysis Center sa Cebu Provincial Hospital-Balamban human pormal kini gi-inagurahan niadtong Marso 4, 2021 diin giturn-over usab ang 10 ka bag-ong hemodialysis units.
Ang Physical Therapy Rehabilitation Center sa maong hospital maoy gi-convert ngadto sa usa ka hemodialysis center gamit ang P2.8 milyones nga pondo gikan sa Department of Health - Health Facilities Enhancement Program (DOH-HFEP).
Matud ni Dr. Olivia Dandan ang hepe sa CPH-Balamban nga ang maong center moserbisyo sa di momenus 25 ka pasyente nga kaniadto maoy regular nga mohulam sa ambulance sa hospital aron moadto sa dialysis center sa syudad sa Sugbo.
Aduna pay laing mga pasyente nga gikan sa Pinamungajan, Toledo City, Tabuelan, ug Tuburan.
“Wala pa ni labot ang ihap sa patients who have their own private cars. Dako kaayo ning tabang kay number one, kon taga-Balamban ka, ang time element, dili na ka mo-travel og layo. Second, ang financial kay naa man ta’y PhilHealth” matud ni Dandan sa report sa Sugbo News ang gidumala nga news portal sa Probinsya sa Sugbo.
Ang CPH-Balamban adunay mga doctor nga nag specialize sa nephrology ug cardiology samtang duha usab ka nurse ang gi-train alang sa pag operate sa dialysis units. MEL (BANATNEWS)