Cebu, Philippines — Nasikop sa kapolisan sa Dakbayan sa Talisay ang tulo ka suspetsadong kawatan kinsa giingong nangawat sa simbahan pipila ka oras human nahitabo ang insidente.
Ang duha sa mga suspetsdo pulos menor de edad samtang ang usa nailhan nga si Jeymar Mahilum, 21-anyos, parehong nagpuyo diha sa Mananga 2, Barangay Tabunok sa nahisgutang siyudad.
Si Mahilum giingong nihimakak kini sa pasangil batok kaniya. Ang mga suspetsado nakita kini sa footage sa Close Circuit Television (CCTV) camera.
Ang duha ka suspetsado giingong niangkon nga sila kadtong nakuha sa footage sa CCTV.
Ang duha ka suspetsdo nangangkong gidala lang sila sa ilang kauban nga gihinganlan og “Jovel” kinsa padayon pa karong gipangita sa kapolisan.
Si Police Lieutenant Colonel Gerard Ace Pelare, hepe sa Talisay City Police Station nagkanayon nga gumikan sa footage ug tabang sa komunidad dali nila nga nadakop ang mga suspetsado.
Subayon usab sa kapolisan kong ang mga suspetsado usa sa mga responsable sa mga insidente sa kawat sa siyudad. (BANAT NEWS)