CEBU, Philippines — Mokabat sa P900,000 ang gibiling danyos sa Ceres Bus nga kalit lang nasunog samtang nagdagan kini sa national highway sa Barangay Pitogo sa Lungsod sa Consolacion niadtong Sabado sa hapon.
Gimaneho ni Eduardo Lopez Pelayo ang nasunog nga Ceres Bus nga nahitabo dihang padulong na unta kini sa pagbalik sa Dakbayan sa Sugbo human sa pagpakanaug sa mga pasahero.
Si Fire Officer One Jaype Ango sa Consolacion Fire Station miingon nga ilang gideklarar nga under control ang sunog sa paglabay sa lima ka gutlo ug ilang gideklarar nga napawong na ang kalayo ala 1:54 na ang takna sa hapon.
Matud pa ni Ango nga tulo nila ka mga fire truck sa Bureau of Fire Protection (BFP) ang dali nga nakatubag sa alarma.
Dugang pa niya nga mitabang usab sa pagpawong sa kayo ang Alegado Fire Volunteers pinaagi sa pagpasirit og tubig sa nagdilaab nga bus.
Namatikdan nga kalit lang migawas ang itom nga aso gikan aircondition system niini.
Si Glenn Arnoza nga maoy konduktor sa bus ang dali nga mipasirit sa fire extinguisher apan wala na makapalong tungod kay daku na ang kayo.
Nunot niini ang mga imbestigador sa kabomberohan sa Consolacion ang kasamtangan pa nga mihimo sa ilang imbestigasyon alang sa pagsuta sa hinungdan sa kalit nga pagkasunog sa Ceres bus. — MEL (BANATNEWS)