CEBU, Philippines — Kinahanglan pa nga mopirma og kasabutan ang mga manindahay sa Basilica sa dili pa sila makabalik sa karaan nila nga pwesto diha sa Jakosalem Street.
Suma pa ni Raquel Arce ang pangu sa PROBE nga tumong niining kasabutan aron gyud magmatngon ang mga manindahay sa ilang responsabilidad.
Lakip sa nalatid sa mga lagda mao ang kanunay nga pagtuman sa health protocol, maninda lang gikan sa alas 6 sa buntag hangtod sa alas sa 6 sa gabii, ipabilin ang kalimpyo sa tindahan, dili magdala og menor de edad sa pagpaninda, dili paabangan o papulihan ingon ibaligya ang pwesto, dili himoong bodega ang pwesto, dili mag repair og imahen sa pwesto ug uban pa.
Apan si Merlinda Batiller, Vice President sa Sto. Niño Sidewalk Vendors Association mihulagway nga kontra kabus ug kontra vendors ang mao nilang lagda ug hangyo nila sa kagamhanan sa siyudad nga wagtangon ang maong undertaking.
“Mao na dili gyud mi uyon ani, kontra kabus, kontra vendors kaning balaura, akong hangyo sa siyudad sa Sugbo, atong Mayor ug si Konsehal Zafra nga nagdala aning mga vendors karon sa kadalanan manghinaot ko mawagtangon ang undertaking”, ni Batiller pa.
Nunot niini, ang pangulo sa PROBE Raquel Arce miingon dunay mga manindahay nakatuman na sa kasabutan hinungdan nga way rason nga ang ubang manindahay dili motuman niini. Samtang Si Konsehal Phillip Zafra, nga maoy nakig-alayon sa mga manindahay mipasabot nga simple ra kani nga hangyo sa siyudad.
Gani siya mitataw nga dili sa tanang higayon nga ang pagbuot sa mga manindahay ang masunod tungod kay ang ilang gilantaw mao lang ang kahapsay. —MEL (BANATNEWS)