CEBU, Philippines — Gipaubos sa heightened alert ang tanang port of entry sa Central Visayas human sa opisyal nga deklarasyon sa African Swine Fever (ASF) sa rehiyon-8 nga maoy labing una nga kaso sa ASF sa Visayas.
Ang direktor sa Department of Agriculture (DA)-7 Salvador Diputado niawhag sa publiko nga motuman ug mo-cooperate sa quarantine authorities.
Niawhag usab siya sa komunidad sa pagtaho dayon diha sa ilang buhatan kong adunay mga baboy sa ilang lugar nga nasakit.
Matud ni Diputado nga dugang DA personnel ang ibutang diha sa tanang port of entry sa Sugbo bisan og wala pa malibkas ang pag-ban sa mga baboy ug processed pork products sukad sa niaging tuig.
Aron masiguro nga maprotektahan ang rehiyon sa pagsulod sa ASF virus, ang tanang stakeholders ug publiko gipahimangnoan nga dili pakan-on og pasaw ang ilang mga binuhing baboy, likayan usab ang pagpalit og mga processed pork products gikan sa mga lugar nga apektado sa ASF, iimplementar ang biosecurity measure sa tanang swine farm ug siguradohon nga ang tanang mga traders ug delivery sa feeds nisunod sa hustong pag-disinfect sa ilang transport vehicles.
Ang DA-7 nibutyag nga ang field reports kabahin sa high mortalities sa swine population sa Abuyog, Leyte giingong sukad pa kini sa unang semana niining buwana.
Ug gumikan sa maong report, ang DA- Central Visayas Animal Disease Surveillance Advisory Committee (CV ADSA) ang nag-convende pinaagi sa virtual meeting niadtong Enero 13, 2021 diin ang chief veterinarian sa upat ka probinsiya ug ubang city veterinarians uban sa Regional Vet Quarantine Services (RVQS)-7 ug Direktor Eduardo Oblena sa National Meat Inspection Services (NMIS)-7
Nasayran nga ang personnel sa local government units nga concerned ug RVQS-7 nga gi-delploy sa mga pantalan ang gimandoan sa istriktong pagsusi sa tanang dokumento sa mga transported swine ug gipasiguro nga ang tanang mga sakyanan nga gikargahan ang natarong og disinfect diin kinahanglang adunay disinfection certificate ang ipresentar diha sa tanang ports.
Ang online application sa shipping permits ang gi-enforced na sa RVQS-7 diin adunay dugang rekisitos sa pagsubmiti sa route plan.
Ang Probinsiya Bohol niadtong Nobiyembre 36, 2020 niisyu kini sa EO 56 s2020 nga nag-regulate sa pag-transport sa mga baboy. Ang Bohol niimplementar karon og regulasyon diin ang trucks nga gikargahan og mga baboy ang magkarga ug magdiskarga diha lang sa designated area sa ilang pantalan.
Subay niini, ang Probinsiya sa Sugbo gikatakdang moluwat og bag-ong executive order kabahin sa pag-establisar og quarantine regulations sa pagsulod sa livestock transport vehicle ug vessels sa probinsiya. —The Freeman/BDB