Cebu, Philippines — Gatosan ka mga tawo ang nawad-an og panimalay ug pumpboats nga gamit nila sa panginabuhian human gibanlas sa dagkong bawod dala sa bagyong Vicky sa nagkadaiyang mga dapit dinhi sa Sugbo.
Sa Dakbayan sa Lapu-Lapu, daghang kabalayan ang nangagusbat ug nangaguba ang mga pumpboats tungod sa dagkong bawod. Sumala pa sa City Social Welfare and Development Office, 145 ka pamiya o 300 ka tawo ang naapektahan sa storm surge nga miigo sa Sitio Apro, Seaside ug Tacan sa Barangay Ibo.
Si Nagiel Bañacia, hepe sa City Disaster Risk Reduction and Management Office sa post niini sa Facebook miingon nga 62 ka balay ang naguba ug 21 ang partially damaged.
Matud ni CSWDO officer-in-charge Annabeth Cuizon padayon pa ang gihimo nilang balidasyon sa gidaghanon sa mga naapektahan.
Si Cuizon miingon nga apil sa mga naapektahan ang barangay Caw-oy, Tingo ug Talima sa Olango Island. Kapin 50 ka pumpboats didto ang naguba ug ang uban di na magamit ug duna say kabalayan nga naguba tungod gihapon sa dagkong bawod.
Si Mayor Junard Chan dili na motugot sa mga naapektahan makatukod og balik sa maong mga lugar apan misaad siya nga prayoridad sila sa socialized housing sa siyudad.
Ang mga naapektahan hatagan og mga relief goods ug kadtong balay naguba gyud makadawat og tag P10 mil kada usa, P5 mil kadtong partially damaged ug tag P3 mil sa mga nag-abang.
Ang Pagasa-Visayas milibkas na kagahapong adlawa sa storm warning signal sa Cebu ug tibuok Visayas ug gipaabot nga karong adlawa masinati ang maayong dagan sa panahon. ( BANAT NEWS)