Cebu, Philippines — Makonsiderar nga dili alarming ang panghitabo nga krimen nga gikalambigitan sa managtiayon o mga tawo nga adunay relasyon sa Dakbayan sa Talisay.
Kini maoy gipadayag ni Police Major Gerard Ace Pelare, pangu sa kapulisan sa Dakbayan sa Talisay.
Si Pelare nagkanayon nga isolated lang ang panghitabo nga pagpatay sa usa ka asawa ug pagpakamatay sa bana.
“I would not say alarming kay wala man gud ni pattern. Ma consider lang siya nga isolated case,” asoy pa ni Pelare.
Ang labing uwahi nga panghitabo mao ang managtiayon nga Zapatos sa barangay San Roque kun diin ang asawa gidunggab patay sa iyang bana samtang ang naulahi naghigot sa iyang liog.
Nasayran mao kini ang ikatulong panghitabo nga krimen diin ang bana mipatay sa iyang asawa diha sa Dakbayan. Suma pa ni Pelare nga iyang ipadangat ang maong mga panghitabo ngadto sa taga City Social Welfare and Development (CSWD), sa kabarangayan ingon man sa simbahan aron mahatagan og lamdag og giya ang mga managtiayon. (BANAT NEWS)