Cebu, Philippines — Kanhi sundalo ang gitumbok nga triggerman sa pagpatay kang Atty. Joey Luis Wee nga nadakpan sa National Bureau of Investigation Central Visayas samtang padayon ang pagpangita ang lima ka lain pa niyang kauban ug mastermind.
Kagahapong adlawa gipasaka na ang kasong pagpatay batok kang Fausto Edgar Benigno Peralta. Si Peralta nadakpan niadtong Miyerkules sa Cabuyao City sa Laguna human nga ang NBI sa tibuok nasud nilusad og hot pursuit operation batok kaniya.
Si Peralta nailhan human na-trace ang iyang pangalan sa girentahang sakyanan nga maoy giingong gigamit sa pagbuhat sa maong krimen. Positibo siyang nailhan pinaagi sa mga ebidensiyang narekober nga nakuha sa CCTV ug pamahayag sa mga testigo.
Nailhan sab ang backup triggerman niini nga si John Raymond Suarez, kinsa maoy giingong drayber girentahang awto, laing kauban nga si Randy Benito Palparan ug duna pay duha nga wala pa mailhi nga gituohang maoy nisunod sa sakyanan ni Wee sa pagpadung niini sa iyang buhatan sa Alchi Building sa Brgy. Kasambagan, Cebu City niadtong Nobiyembre 23,2020.
Si NBI-7 Regional Director Attorney Renan Oliva miingon nga si Peralta nasud sa militar niadtong 1985 ug ni- resign tuig 1990. Siya karon maoy officer-in-charge sa Golden Sun Security Agency nga nagbase sa Luzon.
Si NBI-7 Supervising Agent Wenceslao Galendez, Jr mipresentar sa media sa mga CCTV footages nga ilang nakuha sa crime scene ug ubang lugar nga nagtumbok sa grupo ni Peralta.
Sayo palang nianang adlawa nasigpatan na si Peralta ug mga kaubanan diha sa dapit nga daw naniid. Hangtud nga nahitabo ang aktwal nga pagpamusil kang Wee ug nakuha sa CCTV ang mga kalihokan sa mga suspek hasta ang gigamit nga sakyanan.
Sa pagsusi sa plaka sa sakyanan, nasubay kini sa usa ka rent-a-car company ug ingon man sa pension house, diin sila nag-istar, plane ticket didto nailhan ang pagkatawo ni Peralta ug mga kaubanan.
Sa pagkakaron gipalawman pa sa NBI ang imbestigasyon bahin sa mastermind apan ilang gituohan nga may kalabotan sa trabaho ni Wee isip abogado ang motibo.
Si Attorney Dominador Cimifranca, Assistant Regional Director of NBI-7 miingon nga planado ang pagpatay kang Wee ilabi na ang mga nihimo dili mga taga Cebu City.
Apil sa mga ebidensyang nakuha gikan kang Peralta ang mga gisuot niini atol sa paghimo sa krimen, iyang mga IDs ug uban pa. ( BANAT NEWS)