CEBU, Philippines — Si Konsehal Phillip Zafra nipahibawo nga ang kaparian sa Basilica Minore del Santo Niño ug iyahang komitiba nipresentar kang Cebu City Mayor Edgardo Labella sa mga option ilabi na sa rota sa motorcade procession sa umaabot nga Fiesta Senior.
Matud ni Zafra nga sa maong okasyon gikonsiderar usab nila nga dili lang una himuon ang motorcade tungod kay naobserbahan niya nga kompiyansa na kaayo ang mga tawo ug gikabalak-an niya nga dili unya makontrolar ang mga tawo ug dili usab matuman ang physical distancing.“So, I even contemplating on suggesting to the priest nga there might be a possibility nga i-cancel nalang sab even the motorcade and we will just concentrate on the novena anyway we will be celebrating the 500 years of Christianity by April and hopefully during that time naa nay tambal or vaccine then katong mga activity nga ato untang buot buhaton during the Fiesta Senior in January pwede nato mabuhat by April”, pasabot ni Zafra. Giklaro ni Zafra ang mga plano nga ilang gipahibawo dili pa kini final ug posibleng aduna pay mga kausaban nga mahitabo. Giingong sulod niining buwana i-finalized ang mga plano alang sa kalihokan sa Fiesta Senior sa sunod tuig. Kahinumduman nga gipahibawo sa mga organizer ang ilang plano nga mopahigayon og province-wide motorcade human sa culmination sa Fiesta Senior aron ang mga deboto dili na kinahanglang mobiyahe ug magtapok sa kadalanan sa Metro Cebu aron mosalmot.
Ang kapistahan ni Senior Santo Niño usa ka week-long religious celebration diin ang culmination mahitabo matag ikatulong Domingo sa buwan sa Enero dungan sa pagsaulog sa Sinulog Festival. /BDB (BANATNEWS)