CEBU, Philippines — Ang pagsaulog sa Fiesta Senior sa Dakbayan sa Sugbo sa sunod tuig giingong walay ipahigayon nga foot ug fluvial procession. Kini ang gibutyag ni Konsehal Phillip Zafra, chairman sa committee on public order nga nahinabi sa Banat News.
Matud ni Zafra nga gikauyonan nila uban sa mga kadagkoan sa Basilica Minore del Santo Niño nga karong umaabot nga kapistahan ni Senior Santo Niño wala unay ipahigayon nga foot ug fluvial procession.
Sa matag ikatulo nga semana atol sa adlawng Sabado sa buwan sa Enero matag tuig ipahigayon ang foot ug fluvial procession subay sa kapistahan ni Santo Niño. Apan sukwahi sa naandang mga kalihukan giingong motorkada na lang ang ipahigayon subay gihapon sa 6.5 kilometros nga rota.
Tumong sa maong kausaban sa kalihukan aron mapugngan ang panagtapok-tapok sa mga tawo diin posibleng malapas ang health protocols. Giingong ang siyudad adunay himuong kalihukan atol unya sa Misa de Gallo sa pag-anad sa mga tawo diin mao na kini ang sumbanan panahon sa pagsaulog sa Fiesta Senior.
Si Padre Aladdin Luzon, OSA, in charge sa Peace, Order and Security nitug-an nga nagpadayon pa sila karon sa pag-finalize sa tanang adjustments ug mopagawas unya sila og advisory sa higayon nga ma-final na ang tanan. /BDB (BANATNEWS)