CEBU, Philippines — Mokabat sa P5,000 ang bayad isip multa sa lima ka tawo nga nadakpan sa mga sakop sa Bantay Dagat sa Lungsod sa Tabogon niadtong Sabado sa gabii.
Ang mga nadakpan naaktuhan sa ilang gihimong ilegal nga pagpanagat sa kadagatan sa Tabogon.
Si Police Staff Sergeant Ronnie Alivio sa Tabogon Police Station miingon nga ang lima ka dinakpan pulos taga Palompon, Leyte ug nanagat sa kadagatan nga sakop sa Barangay Pio, Lungsod sa Tabogon sa amihanang bahin sa lalawigan sa Sugbo.
Gitataw ni Alivio nga kalapasan sa gipatuman nga ordinansa sa lokal nga kagamhanan ang pagpanagat sa kadagatan sa maong lungsod kon wala marehistro ang gigamit nga pump boat, ug migamit usab og gagmay o pino og mata nga matang sa pukot.
Dugang pa ni Alivio nga maisip nga kalapasan sa ordinansa ang pagpanagat nga wala usab magbaton og permit gikan sa lokal nga kagamhanan sa maong lungsod.
Subay niini giawhag sa mga otoridad ang mga mananagat sa kasikbit nga mga lugar nga molukat og permit gikan sa lokal nga kagamhanan alang sa ilang pagpanagat.
Ang lima ka mga dinakpan gitanggong na sa detention cell sa kapolisan sa lungsod sa Tabogon apan itugot sa korte ang ilang paggawas human usab sa pagbayad og multa.
Gidugang ni Alivio nga wa silay himoong pagpanakop sa mga mangingisda kun motuman lang kini sa mga lagda sa legal nga pagpanagat. /MEL (BANATNEWS)