CEBU, Philippines — Nabantayan karon sa mga kadagkoan sa Cebu City Health Department nga sagad sa mga bag-ong kaso sa novel coronavirus sukad nga gipaubos ang siyudad sa General Community Quarantine, nakuha ang sakit gikan sa trabahoan ug nadala sa balay.
Base sa data nga nakolekta sa local contact tracing teams ug human nabasa sa CHD sa mga nangaging semana, ang trend sa tinubdan sa bag-ong mga kaso gikan sa trabahoan ngadto sa panimalay.
Mao nga sa dihang ang siyudad nipahibawo niadtong Agosto 21 nga nakab-ot na sa siyudad ang ‘flattened curve’ sa pagsaka sa kaso, nitala og dugang 39 ka kaso ang dakbayan.
Mao kadto ang kinadaghanan sud sa nakalabay nga pito ka adlaw nga sagunsong di molapas 30 ang mga natalang bag-ong kaso. Tungod niini, naalarma ang tanan.
Nasuta sa contact tracing nga ang 15 sa 39 nga bag-ong kaso nagagikan sa duha lang ka trabahante nga nibalik na sa trabaho apan nasuta nga positibo sa COVID-19, ang duha maoy giisip nga index cases.
“Being close household contact, all family members, as well as those close contacts of the index cases at work, were subsequently swabbed. As a result, 10 and five family members of the two index cases were found positive,” matud pang Cebu City councilor kinsa mao sab ang EOC deputy chief implementer Joel Garganera.
Giawhag karon ang mga Sugboanong namalik na sa trabaho nga mag-amping gyud kanunay ug sundon ang health protocols dili lang sa trabahoan kondili hasta sab sa ilang panimalay.
Si Dr.Michelle Linsalata mipasidaan nga bisan kanang mogawas lang sa balay kay dunay gikuha sa gawas o mitambong sa trabaho, maisip na kini nga ‘exposure.’ Usa lang ka sipyat pagsunod sa health protocols mahimo nang matakdan sa COVID-19.
“So if you are going out, act as if you are positive even at home. Workplace to household transmission is a reality for all of us,” dugang pagpasabot ni Garganera.
Matud ni Garganera kinahanglang ibutang gyud sa kasingkasing ang pagsunod sa mga health protocols gumikan kay responsibilidad sa tanan ang panglawas sa pamilya.
Samtang kadtong laing 14 ka positibo nga natala nianang adlawa nasuta nga mga dinakpan sila sa kapolisan ug nangatanggong sa prisohan. Ang mga kauban nilang dinakpan gipaubos na sab sa swab testing.
Ug nigawas nga siyam ka sakop sa kapolisan apil na ang ilang sulogoon ug 20 ka detainees ang gipanid-an karon ang panglawas.
Sa datos sa Agosto 22 gikan sa DOH-7, ang siyudad duna karoy 1,255 aktibong kaso human nadugangan og 12 ka bag-ong kaso anang adlawa.
Gipanawagan karon sa EOC ang publiko nga buhaton sab ang ilang parte sa pagpahunong sa pagkatap sa virus pinaagi sa pagsunod sa tanang health protocols.
Sa mga gustong motabang o mosumbong mahimong motawag sa EOC hotlines-233-4194, 254-8637, 411-0126, 411-0102 o sa 0923-9378599, 0923-9378596, 0909-9431037, ug 0909-9402158. The Freeman/IBM (BANATNEWS)