CEBU, Philippines — Isip pagpangandam sa pagbukas sa mga kalihukan sa turismo, ang Lungsod sa Barili dunay giandam nga ikatanyag nga dugang atraksyon sa mga turista tumong sa pag-ila sa lungsod isip bag-ong subang alang sa ecotourism adventure sa Sugbo. Kini mao ang dolphin watching sa kadagatan sa Barangays Japitan ug Hilasgasan ug ang Barili All-Terrain Vehicle (ATV) Adventure sa Barangay Nasipit diin malantaw ang kanindot sa Tañon Strait ilabi na dayun sawop sa adlaw.
Matud ni Mayor Marlon Garcia nga naabtan og duha ka buwan ang iyang municipal tourism team sa pagdeterminar kung asa gyud makit-an ang mga dolphins sa kadagatan sa ilang lungsod nga sakop sa Tañon Strait Protected Seascape.
Si Municipal Tourism Officer Victor “JR” Vergara niingon nga atol sa site tour niadtong Sabado maoy unang pagpakita sa dolphins diin singko minutos pa lang sa ilang pagbiya gikan sa pantalan sa Japitan nitumaw dayun ang dolphins nga nagtinaglima.
Bana-bana ni Vergara nga moabot sa 200 ka dolphins ang anaa sa lugar ug makita ra dayun sulod sa usa ka kilometro gikan sa baybayon sa Japitan ug Hilasgasan.
Ang lungsod nag-andam na karon sa mga gikinahanglan nga mga balaud aron maprotektahan ang kalikupan dungan sa paglambo sa ekonomiya sa lungsod.
Sa laing kalingawan, ang Barili ATV Adventure abli na alang niadtong mga mahiligon niini.
Mokabat sa 12 ka kilometros ang gitas-on sa batoon nga dalan, kalapokan, pangpang ug anapog nga bahin nga subayan sa ATV diin makapanglantaw usab sa Tanon Strait sa kasadpang bahin ug masaksihan ang pagsawop sa adlaw.
Ang Barili ATV Adventure kantidad og P600 hangtud P800 matag usa depende sa kalisud sa agianan nga.
Dunay tulo ka bahin sa agianan diin ang kinatumyan mao ang Bangaglapus Cave, laing tourist spot sa lungsod.
Andam na ang disinfecting foam para sa protective gears ug ultraviolet germicidal light nga molimpyo matag human sa paggamit ug dunay gibutang nga handwashing station.
Ang mga trained guides mohatag og pagpasabot sa mga bisita sa dili pa sugdan ang kalingawan.
Ang kalihukan kabahin kini unya sa tourist packages sa mga bisita pinaagi sa provincial online booking portal nga padayon pang giugmad.
Laing gitanyag sa lungsod ang nindot nga baybayon nga kaligoanan sa Sayaw ug ang Mantayupan Falls. (BANATNEWS)