CEBU, Philippines — Temporaryong gipasirad-an sa lokal nga kagamhanan sa lungsod sa Badian ang Badian Highlands alang sa sight-seeing ug tourism activities.
Kini human nga nag viral ang hulagway sa mga tawo nga nidagsa didto sa maong dapit niadtong Dominggo Hulyo 19, 2020 diin makita nga wala na magsul-ob og face mask ang uban ug wala na usab masunod ang physical distancing protocol.
Tungod niini niluwat og Executive Order No. 22 si Badian Mayor Carmencita Lumain nga temporaryong pagsirado sa maong tourist site.
"Karon nag-issue og closure order si Mayor, EO-22 for indefinite closure of Badian Highlands awaiting for the guidelines sa tibuok tourism industry nga i- approve ug i-issue ni Gov Gwen" matod ni Donald Villar ang tourism officer sa lungsod sa Badian
Matod ni Villar kasagaran moadto sa Badian Highlands mao ang mga motor riders gikan sa nagkadaiyang lungsod ug dakbayan sa Probinsya sa Sugbo particular na sa South.
Gitug-an ni Villar nga adunay checkpoint pagpadulong sa maong area apan matod ni Villar "inig agi nila (mga bisita) sa among checkpoint kumpleto sila sa face mask, pag-abot didto ilang huboon kay gusto sila mo hanggap og presko nga hangin".
Ang Badian Highlands usa sa paborito nga tapukan sa mga riders tungod sa panoramic view niini kon diin makita ang tibook Southwestern side sa Probinsya lakip na ang Tañon Strait ug ang atbang nga isla ang Negros lakip na ang Kanlaon volcano.
Kasagaran sa mga moadto didto mag sugod alas 4 sa hapon hangtod alas 7 tungod sa sunset.
Apan tungod sa tapok nga nahitabo niadtong Dominggo dili usa pasudlan ang maong area ug gipahugtan sa lungsod ang chekcpoint ug walay makasulod gawas lang sa mga residente sa maong dapit. Aron makaadto sa Badian Highlands kinahanglan mobyahe sa 13 ka kilometro nga dalan nga nagsakop sa Barangay Poblacion, Taytay, Basak,Talayong, ug Dobdob gikan sa national highway. /MEL (BANATNEWS)