CEBU, Philippines — Giawag ni Konsehal Alvin Dizon sa Dakbayan sa Sugbo, ang administrasyon ni Mayor Edgardo Labella sa pag re-align sa (400)upat ka gatos ka milyon ka pesos nga gigahin sa infrastructure project aron gamiton sa pagpakigbatok sa Coronavirus Disease.
Matud pa ni Dizon nga dili tukma ang pag gasto ug dul-an sa tunga sa bilyon ka pesos nga proyekto sa infrastraktura taliwa sa giatubang karon nga seryosong kadaut sa ekonomiya gumikan sa corona virus pandemic.
Kahinumduman , si Mayor Labella, sa iyang supplemental budget no. 3 migahin ug mokabat sa 3.3 ka bilyon ka pesos, 500 ka milyon gamiton sa pagpalit ug relief goods, samtang ang 400 ka milyon ka pesos alang sa nagkalain-laing infrastructure project.
Kabahin sa maong pundo gamiton sa hazard pay sa mga empleyado sa city hall nga miserbisyo sa siyudad samtang ubos sa lockdown ingon man sa financial assistance sa mga senior citizens nga nadugang sa karaan nga listahan. Dugang pa ni Dizon, ang 400milyon ka pesos mas maayo gamiton sa pagpamalit ug dugang relief goods o mga panginahanglanon alang sa pakigbatok sa covid-19, ilabi na karon nga ang siyudad gibalik na sa Enhanced Community Quarantine diin daghan sa mga sugbuanon ang nawad-an ug panginabuhian.
Nagkanayon si Dizon, ang covid-19 usa ka wake-up call aron ang dakbayan mogahin ug dugang pundo alang sa pagpalambo sa food production, social housing, health care system ug uban pa. /MEL (BANATNEWS)