CEBU, Philippines — Gihangyo sa konseho sa Siyudad sa Sugbo ang Department of Manpower Development and Placement nga magtanyag og short-term skills training programs sa mga technical-vocational courses alang sa “displaced workers” sa sulod ug gawas sa nasud.
Lakip sa gihangyo sa konseho ang Technical Education Skills and Development Authority 7 ug pribado nga sector alang sa maong programa.
Si Konsehal Alvin Dizon nga maoy nangamahan sa resolusyon alang sa maong hangyo niingon nga kini aron matabangan ang “displaced workers” nga dunay laing kapanginabuhian ilabi na karong panahon sa walay kasegurohan sa ekonomiya tungod sa krisis sa panglawas.
Gihangyo usab niya ang DMDP nga maghimo og usa ka economic program nga magamit sa mga displaced workers ang ilang mga kahibawo ug kahanas ubos unya sa “new normal.”
Dugang pa niya nga naobserbahan nga ang mga tawo nahimo nga mamugnaon ug negosyante sa panahon sa pandemya pinaagi sa pagnegosyo sa balay ug pagbaligya pinaagi sa mga online platform sama sa food production, pagbaligya sa uban pang mga batakang palaliton sa pagkaon sama sa mga prutas, utanon, karne, ug uban pang mga butang nga may kalabutan sa kahimsog nga mapuslanon ug may kalabutan sa panahon sa krisis. (BANAT NEWS)