CEBU, Philippines — Usa ka lalaki nga giingong hubog nga nisawom sa dagat ang patay na nga napalgan niadtong Huwebes diha sa kadagatan sa Barangay Jubay, Lungsod sa Liloan. Si Police Master Sergeant Jonas Catubig sa Liloan Police Station niila sa namatay nga si Aljhon Malinao Initan, 27-anyos, nagpuyo sa maong dapit.
Matud pa ni Catubig nga kuyog ni Initan sa pagpangaligo ang mga ig-agaw niini kinsa ilaha ra usab nga mga silingan.
Giingong mga alas 7:00 sa buntag niadtong Huwebes nangaligo ug nag-inom og ilimnong makahubog ang manag-agaw. Ang ig-agaw ni Initan nga si Pablo Mondelo, 56, nibutyag sa mga polis nga hubog na si Initan dihang nisawom kini sa dagat mga alas 11:00 sa buntag sa maong adlaw.
Apan wala na makatunga gikan sa iyang pagsawom si Initan ug pipila ka oras ang nakalabay nilutaw na ang lawas niini. Dugang ni Catubig nga ang municipal health officer sa lungsod nga nihiling sa lawas ni Initan ang nideklara nga patay na kini. /BDB (BANATNEWS)