CEBU, Philippines — Makig-alayon ang Police Regional Office 7 sa mga tambalanan sa Metro Cebu aron malikayan ang susamang insidente sa Vicente Sotto Memorial Medical Center.
Si PRO-7 Regional Director, Police Brigadier General Albert Ferro, niluwat sa maong pamahayag human usa ka pasyente sa coronavirus ang nagpakamatay niadtong Martes sa buntag.
Dugang pa ni Ferro nga ang tumong sa pagpakig-alayon nila sa mga tambalanan aron paglikay sa susamang insidente diin ang pasyente tungod sa depression ang modangop nalang sa paghikog.
Gipasabot ni Ferro bisan pa man nga dili kini trabaho sa kapolisan apan aduna siyay gitahasan nga makig-alayon sa mga tambalanan aron susihon unsay ilang ikatabang o kaha ang pagbutang og police personnel sulod sa hospital.
Gikinahanglan usab nga kanunay nga pasabton ang mga pasyente nga ang maong matang sa virus dili angayan nga kahadlokan tungod kay ang gobiyerno motabang kanila nga maayo sila sa sakit. /GMR (BANATNEWS)