CEBU, Philippines — Nipadayag og kasagmuyo ang anak ni kanhi Police Captain Delfin Bontuyan kalabutan sa imbestigasyon sa pagpusil patay sa iyang amahan diin karong adlawa ang kasumaran sa maong hitabo ug wala pa gihapon kini mahatagi og hustisya.
Si Christine Claire Bontuyan nagkanayon nga wala siya matagbaw sa gibuhat nga imbestigasyon sa Special Investigation Task Group (SITG) tungod kay wala pa mailhi ang kriminal.
“Honestly dili because wala ko kasabot nganong until now there’s no progress. I don’t think there’s progress, we don’t have any leads as who the people responsible, where basically they’re still out there, they’re still roaming around freely, ang mga nagpaluyo nila they getting away with it and like I said its very disheartening”, matud ni Bontuyan.
Ang direktor sa CCPO Police Colonel Josefino Ligan nagkanayon nga adunay lead ang imbestigasyon sa SITG sa pagpatay kang Bontuyan ug wala usab hunungi ang pagpahigayon sa imbestigasyon sa maong kaso.
Gipatutokan usab ni Ligan karon ang Close Circuit Television (CCTV) camera sa tigunguha nga pagsulbad sa kaso.
Si Bontuyan kinsa nagpangedaron og 55-anyos niadtong higayona ang gikan nitambong og hearing sa korte dihang gipusil patay kini sa riding in tandem niadtong Mayo 21 sa nilabayng tuig diha atubangan sa usa ka dakong mall sa North Reclamation Area sa Barangay Mabolo, Dakbayan sa Sugbo. Si Christine nagkanayon nga 11 ka samand pinusilan upat niini sa ulo ug ang pito sa lawas ang naangkon sa iyang amahan.
Karong adlawa isip paghandom sa kamatayon ni Bontuyan ang iyang pamilya moduaw sa dapit diin siya gipusil patay aron magbutang og krus ug maghalad usab og buwak. /BDB (BANATNEWS)