CEBU, Philippines — Giuktaba una sa Dakbayan sa Sugbo ang pagpahigayon niini og massive testing alang Coronavirus Disease 2019 (COVID-19) nga sugdan unta karong adlawa ug gisibog kini karong Mayo 6 sa adlaw nga Miyerkules.
Karong adlawa unta magsugod ang Cebu City, Mandaue City, ug Lapu-Lapu City sa massive rapid testing.
Si Cebu City Mayor Edgardo Labella mitawag kagahapong adlawa kang Dr. Jaime Bernadas, pangulo sa Department of Health-7 ug kang Dr. Daisy Villa ang pangulo sab sa Cebu City Health Department alang sa panagtigum ug diskusyon bahin sa plano ug mga lakang batok sa virus.
Nadesisyonan sa meeting nga ioktaba una kini aron matubag ang mga pangutana ug kabalaka sa mga barangay.
Target sa massive testing ang 10 porsiyento sa kinatibuk-ang panimalay sa matag barangay sa kada siyudad. Base sa datus sa city health departments sa tulo ka siyudad, moabot 46,896 ka tawo ang kinahanglang ipaubos sa maong test.
Kabahin kini sa “Project Balik Buhay” nga gipasiugdahan sa Office of the Presidential Assistant for the Visayas (OPAV) inabagan sa DOH-7 ug sa tulo ka siyudad.
Sa pikas bahin, si Cebu City Vice Mayor Michael Rama miklaro nga dili ang Konseho ang niawhag sa pagoktaba sa rapid mass testing. Kini human nga si Cebu City Councilor Antonio Cuenco miingon sa us aka artikulo nga giawhag niya ang suspension sa rapid mass testing, ug kinahanglang pasabton sa DOH ug city officials ang konseho bahin niini una pa kini ipatuman.
Matud ni Rama way mosyon aron suspenuhon kini nga giduso didto sa konseho, apan dunay nga kabalaka nga gusto sa konseho nga maklaro ug mapasabot.
Usa ka special session pinaagi sa teleconference ang himuon karong adlawa ug imbitahon si Cebu City Mayor Edgardo Labella ug mga hingtungdang mga ahensya sama sa DOH, City Health, ug City Disaster and Risk Reduction Council ug uban pa.
Matud ni Rama, buot nilang masayran ang policy direction, COVID-19, rapid testing, ug ang Balik Buhay Project. “Sa tinuod I wish it is being taken to consideration whether there is really such thing as being ready because mao na siya ang concern what if ang outcome let’s say 3000 positive aha mana ibutang? Dili raman na executive concern, that is also a council concern because the council has a mandate and we have an obligation to our respective constituency and therefore it is just proper on the part of the council that we should be properly appraised para naa pud mi ikatubag mao gyud ang concern sa council,” matud ni Rama.
Dunay gilain nga P30 milyones nga budget ang siyudad alang sa pagpamalit og rapid mass testing kits alang niini. – Alicia Ivy L. Chua /IBM
Dialysis patients sa probinsya, papuy-on sa Women’s Center
Aron malikayan ang posibilidad nga matakdan sa coronavirus (COVID-19) kadtong mag pasyenteng kinahanglang mag-dialysis, gamiton sa Kapitolyo ang Women’s Center niini sa Sudlon, Lahug sa Dakbayan sa Sugbo aron temporaryong kapuy-an sa mga dialysis patients nga taga Probinsya sa Sugbo.
Kini tungod kay wala isalikway ni Governor Gwendolyn Garcia ang posiblidad nga matakdan sila o ilang kaubang kabanay sa maong sakit diha sa mga tambalanan sa Cebu City diin sila regular nga magpa dialysis ug madala nila pagbalik sa ilang mga lungsod ug mokuyanap hinuon didto ang virus. Nahimo sa gobernador ang desisyon human nipadangat og concern ang mga mayor ug health workers sa mga lungsod ug dakbayan sa probinsya, kini human usab nga adunay dialysis patient sa Daanbantayan nagpositibo sa maong sakit ug namatay tungod sa cardiac arrest samtang nagpadulong pa sa hospital sakay sa ambulansya.
“Busa mohangyo ta sa dialysis patients nga mangita og kapuy-an dinhi. Ug dili gyud mahimo ug dili makaya nga moabang og balay o balay sa paryente nga kapuy-an, ato i-convert atong Women’s Center alang sa dialysis patients,” matud ni Garcia sa report sa Sugbo News.
Si Garcia niawhag sa mga mayor ug health workers sa listahan sa gidaghanon sa mga kabus nga dialysis patients aron makaandam ang Kapitolyo. “Tungod kay nabalaka (ang mga Mayor) sa pagsulod og balik sa dialysis patients (in their localities) labi na immunocompromised ni sila, ang local chief executive na ana maoy dunay moral persuasion alang sa kasiguradohan na ari una sila (Cebu City) or else di na mo ka issue (cross border certification) “ dugang ni Garcia sa report sa Sugbo News.
Ang gobernador mo issue og laing Executive Order alang sa pag set og protocols alang sa mga dialysis patients nga kinahanglan mobiyahe padulong Cebu City alang sa ilang regular session. /IBM (BANATNEWS)