CEBU, Philippines — Gitanggong karon sa detention cell sa kapolisan sa Dakbayan sa Danao ang lima ka sugarol kinsa naaktohan nga nagtibakay diha sa Tuburan Sur, Dakbayan sa Danao niadtong Miyerkules sa buntag.
Ang mga nasikop mao sila si Fabian Roseco, 21, John Mark P Prieto, 38, John Mark Malon, 28, Joshua Baton, 39 ug Beldensque Prieto, 34, pulos nagpuyo sa maong dapit.
Ang kapolisan sa Dakbayan sa Danao nga gipangulohan ni Police Senior Master Sergeant Marlon Remullo ang nagpatarolya ug ilang nasigpatan ang nagtapok nga mga lalaki nga nagtigbakay diha sa maong dapit.
Ang maong mga nagtigbakay nabungkag kini sa pagpanagan dihang nakabantay sa mga polis apan ang nahisgutang lima ang nagunitan kini.
Nasakmit sa mga polis gkan sa mga suspetsado ang manok nga pula ug ogis nga hiniktan nga pulos na gitaoran og tari ug P340 nga kwarta nga giingong pusta.
Gawas niini, laing duha ang nadakpan sa kalapasan sa curfew ug enhance community quarantine sa Upper Yati, Lungsod sa Liloan sa maong adlaw.
Si Police Chief Staff Sergeant Jonas Catubig sa Liloan Police Station miila sa duha nga mao sila si Darrel Olivo Adlawan, 22 ug John Gilbert Socatan, 19, pulos taga Barangay San Vicente sa maong lungsod.
Matud ni Catubig nga ang duha nga pulos nakainom og ilimnong makahubog ang nasigpatan sa nagpatrolya nga kapolisan nga naglakaw diha sa maong lugar nga walay quarantine pass ug face mask.
Sa laing bahin, usa ka lalaki nga gikalalis sa collector sa usa ka security agency nga giingong nasuko nga gipaningil sa binulan nga obligasyon niini ang natingkagol sa detention cell sa Liloan Police Station human nasakmiti og armas.
Ang nasikop mao si Ullysses Catalan Jr., nagpuyo sa Phase 2 Countryside Subdivision sa Barangay Tayud sa maong lungsod. .
Giingong si Antonio Socong Jr. ang nangolekta sa binuwan nga obligasyon sa security agency nga gitrabahoan niini.
Ang maong pagpaningil sa security agency nga iyang gitrabahoan gikasuko kini ni Catalan nga misangko sa panaglalis.
Nakamatikod si Socong nga nagdala og armas ang suspetsado hinungdan nga dali kining nitawag sa buhatan sa kapolisan.
Ang suspetsado giingong nasakmitan kini og kalibre .45 nga pistola nga dunay magazine ug mga bala. /BDB (BANATNEWS)