CEBU, Philippines — Mokabat sa 40 ka personnel sa Cebu City Transportation Office ang mopahigayon pag-disinfect sa mga bus nga gigamit sa libreng sakay nga maglibot-libot diha sa kadalan sa Dakbayan sa Sugbo.
Sayo pa, si Mayor Edgardo Labella nigahin og libreng kasakyan ilabi na ngadto sa mga frontliner ug sa mga tawo nga adunay importante nga tuyo sa siyudad ug makahimo paggawas human nagpatuman og enhanced community quarantine.
Ang pag-disinfect gisugdan kini sa mga sakop sa CCTO niadtong Marso 30, 2020 sa hapon.
Nunot niini, ang pangulo sa CCTO Alma Fe Casimero hugot usab nga nipatuman sa social distancing ug “no face mask no ride policy” ngadto sa tanang sumakay.
Ang CCTO personnel mo-disinfect sa mga bus sa dili pa kini makalarga ngadto sa ilang tagsa-tagsa ka mga destinasyon.
Ang biyahe sa mga bus gikan sa alas 4:00 sa kadlawon ngadto sa alas 9:00 sa gabii. /BDB (BANATNEWS)