CEBU, Philippines — Nipagawas si Cebu Archbishop Jose Palma og giya alang sa Liturgical and Devotional Celebrations sa Holy Week sa mga parokya.
Base sa Circular 7/20 nga gipadala sa tanang parokya, kanselado gihapon ang mga kalihukan sa Holy Week nga tambongan sa bagang duot sa katawhan ug ipadayon ang Missa Sine Populo o misa nga walay tawo gawas lang sa pari ug pipila ka kaubanan niini.
Sa circular nga gipagawas sa Arsobispo gibutyag ang mga angayan nga buhaton sa kaparian alang sa kalihukan sa Semana Santa nga nagsugod sa Chrism Mass, Palm Sunday of the Lord’s Passion, Popular Piety and Devotions, Tinieblas, Huwebes Santo, Biernes Santo, Black Saturday ug Easter Sunday.
Giawhag sa Arsobispo ang mga magtutuo sa pagsunod sa mga live streaming celebrations samtang gisuspenso pa ang mga kalihukan sa simbahan tungod sa coronavirus disease 2019.
Samtang gidasig usab sa Arsobispo ang magtutuo ug kaparian sa pagtabang sa mas labing nanginahanglan sa iyang gipagawas nga Circular 8/20 nga gitawag og “a call to practical faith response in the light of COVID-19 pandemic” diin mopabarug siya og Archbishop Teofilo Camomot Buhat sa Kalooy Program nga magtabang sa pamilya ug komunidad nga grabeng naapektahan sa COVID-19. /GMR (BANATNEWS)