CEBU, Philippines — Gisuspenso sa lokal nga kagamhanan sa Lungsod sa Badian ang canyoneering activity sa Matutinao River lakip na sa Kawasan Falls tungod sa hulga sa coronavirus disease.
Si Mayor Carmencita Lumain nimando sa temporaryong pagpahunong sa canyoneering ug pagsirado sa Kawasan Falls sugod karong adlawa hangtud nga mohatag na og laing abiso kun kanus-a kini buksan ngadto sa mga turista.
Samtang giangkon sa Hotel Resort and Restaurants Association of Cebu nga posibleng mas ubos pa ang occupancy rate sa mga accommodation establishments sa Sugbo human gipaubos sa community quarantine ang Metro Manila.
Matud ni Carlo Suarez, presidente sa HRRAC, nga karon lang nasinati na ang ubos sa katunga ang pag-ubos sa mga guests diin uban niabot pa og 30 porsyento. “We will be experiencing kamingawon as of to date we are receiving cancellations sa mga nagpa-reserve,” dugang ni Suarez.
Si Suarez nagkanayon nga pipila sa mga establisemento ang nipabakasyon una sa ilang mga trabahante.
Matud ni Suarez nga ang gihimo nila karon mao ang pag-promote sa domestic tourism diin nakig-alayon ang HRRAC sa Kapitolyo alang sa pagpahigayon sa Suroy-Suroy Alang sa Sugbo.
Ang maong kalihukan ilusad sa Marso 20 hangtud Hunyo diin motanyag og promo package ang mga hotels, resorts ug mga restaurants apil na mga malls alang sa mga domestic tourists. /GMR (BANATNEWS)